2014 సార్వత్రిక ఎన్నికల ప్రచారంలో మోదీ చేసిన వాగ్దానాన్ని గుర్తు చేస్తూ 16 కోట్ల ఉద్యోగాలపై నిలదీశారు కాంగ్రెస్ చీఫ్ మల్లికార్జున ఖర్గే. ఏడాదికి రెండు కోట్ల ఉద్యోగాల లెక్కన గడిచిన ఎనిమిదేళ్లలో 16 కోట్ల ఉద్యోగాలు ఇవ్వాలని, అలాంటిది లక్షలోపు ఉద్యోగాలు కూడా ఇవ్వడం లేదని ఆయన దుయ్యబట్టారు. ''ప్రభుత్వ రంగంలో 30 లక్షల ఉద్యోగాలు ఖాళీగా ఉన్నప్పటికీ మోడీ ప్రభుత్వం కేవలం 71 వేల ఉద్యోగాలు మాత్రమే ఇస్తున్నారు. వాస్తవానికి ఏడాదికి 2 కోట్ల ఉద్యోగాలు ఇస్తానని మోదీ వాగ్దానం చేసి అధికారంలోకి వచ్చి 8 ఏళ్లు అవుతోంది. ఈ లెక్కన 16 కోట్ల ఉద్యోగాలు ఇవ్వాలి. కానీ లక్ష ఉద్యోగాలు కూడా సృష్టించలేదు. కనీసం ఖాళీగా ఉన్న ఉద్యోగాలను కూడా భర్తీ చేయడం లేదు. కోట్ల ఉద్యోగాల గురించి ఎంత తక్కువ మాట్లాడితే అంత మంచిది'' అని ఖర్గే అన్నారు.
