తెలంగాణకు రానున్న కేంద్ర బలగాలు

తెలంగాణలో అసెంబ్లీ ఎన్నికల సందర్భంగా ఎలాంటి అవాంఛనీయ సంఘటనలు జరగకుండా కేంద్ర పారామిలటరీ బలగాలకు చెందిన దాదాపు 20 వేల మంది సిబ్బందిని మోహరించాలని భారత ఎన్నికల సంఘం నిర్ణయించింది. మరో రెండు రోజుల్లో 100 కంపెనీలకు చెందిన 20 వేల మంది కేంద్ర పారామిలటరీ బలగాలు రాష్ట్రానికి రానున్నాయి. ఒక్కో కంపెనీలో అస్సాం రైఫిల్స్, బోర్డర్స్ సెక్యూరిటీ ఫోర్స్ , సెంట్రల్ ఇండస్ట్రియల్ సెక్యూరిటీ ఫోర్స్ , సెంట్రల్ రిజర్వ్ పోలీస్ ఫోర్స్, ఇండో టిబెటన్ బోర్డర్ పోలీస్, నేషనల్ సెక్యూరిటీ గార్డ్స్ సశాస్త్ర సీమా బల్ నుండి 60-80 మంది సిబ్బంది ఉంటారు. ఈ సిబ్బంది అంతా తెలంగాణ పోలీసులతో సమన్వయం చేసుకుంటూ ఎన్నికల సమయంలో విధులు నిర్వహిస్తారు. కేంద్ర పారా మిలటరీ బలగాలు లెక్కల్లో చూపని నగదు, అక్రమ మద్యం రవాణాను అరికట్టడానికి రాష్ట్ర సరిహద్దుల దగ్గర ఇలాంటి శిబిరాలను ఏర్పాటు చేయడమే కాకుండా, కీలకమైన ప్రాంతాల్లో తాత్కాలిక భద్రతా తనిఖీ శిబిరాలను ఏర్పాటు చేస్తాయి. ముందస్తుగా, ఈ బలగాలు ఫ్లాగ్ మార్చ్‌లను నిర్వహించడం ద్వారా ఓటర్లలో భయాన్ని పోగొట్టడానికి సమస్యాత్మక ప్రాంతాల్లో దశలవారీగా గస్తీ నిర్వహిస్తాయి.కేంద్ర పారామిలటరీ బలగాలు కూడా సమస్యాత్మక ప్రాంతాల్లో పోలింగ్ కేంద్రాలను గుర్తించి స్వతంత్రంగా విధులు నిర్వహిస్తాయి. సమస్యాత్మకంగా లేని చోట్ల సిబ్బంది స్థానిక పోలీసులతో సమన్వయం చేసుకుని బందోబస్త్ విధులు నిర్వహిస్తారు. అంతే కాకుండా ఓటింగ్ తేదీకి ముందే పోలింగ్ కేంద్రాలు, ఎలక్ట్రానిక్ ఓటింగ్ మిషన్లు (ఈవీఎంలు) భద్రపరిచే స్ట్రాంగ్ రూమ్‌లను సిబ్బంది తమ ఆధీనంలోకి తీసుకుంటారు.