హైదరాబాద్ అమీర్‌పేట్‌లోని సత్యం థియేటర్ స్థానంలో 'ఆసియన్ అల్లు సత్యం థియేటర్'ని అందుబాటులోకి తీసుకు వస్తున్నారు. ఈ థియేటర్ లాంచ్ ఈవెంట్ నేడు ఘనంగా జరిగింది. ఈ కార్యక్రమానికి అల్లు అర్జున్, తెలంగాణ సినిమాటోగ్రఫీ మంత్రి తలసాని శ్రీనివాస్ యాదవ్ , అల్లు అరవింద్ ముఖ్య అతిథులుగా వచ్చారు. బన్నీ చేతులు మీదగా ఈ థియేటర్ ఓపెనింగ్ జరిగింది. రేపటి నుంచి ఈ థియేటర్ లో సినిమాలు ప్రదర్శించబోతున్నారు. మొదటి సినిమాగా ప్రభాస్ ఆదిపురుష్ రిలీజ్ కాబోతుంది. ఈరోజు నుంచి ఈ సినిమాకి సంబంధించిన టికెట్ బుకింగ్స్ జరగనున్నాయి. ఈ థియేటర్ లో మొత్తం 5 స్క్రీన్స్ అందుబాటులో ఉండబోతున్నాయి. మొదటి స్క్రీన్ బార్కో లేజర్ ప్రొజెక్షన్ అండ్ ATMOS సౌండ్ కలిగి ఉంటే, సెకండ్ స్క్రీన్ ఎపిక్ లుజోన్ స్క్రీన్ అండ్ ATMOS సౌండ్ కలిగి ఉంటుంది. ఇక మిగిలిన మూడు స్క్రీన్స్ 4K ప్రొజెక్షన్ తో ఉండబోతున్నాయి. అలాగే మొత్తం స్క్రీన్స్ Dolby 7.1 సౌండ్ తో రాబోతున్నాయి. అలాగే ఆసియన్ సత్యం మాల్ లో పాపులర్ ఫుడ్ బ్రాండ్స్ తో బిగ్ ఫుడ్ కోర్ట్ ని కూడా అందుబాటులోకి తీసుకు రాబోతున్నారు. ఇక అల్లు అర్జున్ ని చూసేందుకు అభిమానులు థియేటర్ వద్దకి భారీగా తరలివచ్చారు. వారికి అభివాదం చేస్తున్న అల్లు అర్జున్ వీడియోలు నెట్టింట వైరల్ అవుతున్నాయి.
