శ్రీవారి భక్తులకు గుడ్న్యూస్. వైకుంఠ ఏకాదశిని పురస్కరించుకుని వైకుంఠ ఏకాదశి ద్వార దర్శన టికెట్లను తిరుమల తిరుపతి దేవస్థానం విడుదల చేసింది. డిసెంబరు 23 నుంచి జనవరి 1 వరకు కొనసాగనున్న వైకుంఠ ద్వార దర్శనానికి సంబంధించిన రూ.300 ప్రత్యేక ప్రవేశ దర్శన టికెట్ల (ఎస్‌ఈడీ)ను ఉదయం 10 గంటలకు టీటీడీ విడుదల చేసింది. మొత్తం 2.25 లక్షల టికెట్లను ఆన్లైన్లో ఉంచింది. భక్తులు ttddevasthanam.ap.gov.in వెబ్సైట్లో టికెట్లు బుక్ చేసుకోవాలని సూచించింది. అదే విధంగా మధ్యాహ్నం 3 గంటలకు శ్రీవాణి ట్రస్టు దర్శన టికెట్ల కోటాను విడుదల చేయనున్నారు. రోజుకు 2 వేల టికెట్ల చొప్పున.. 10 రోజుల పాటు 20 వేల టికెట్లను టీటీడీ విడుదల చేస్తుంది. సాయంత్రం 5 గంటలకు వసతి గదుల కోటాను అందుబాటులో ఉంచనుంది. శ్రీవారి ఆలయంలో ఈ నెల 12న దీపావళి ఆస్థానం సందర్భంగా వీఐపీ బ్రేక్‌ దర్శనాలను రద్దు చేసినట్లు తిరుమల తిరుపతి దేవస్థానం ఓ ప్రకటనలో తెలిపింది. ప్రొటోకాల్‌ దర్శనం మినహా మిగిలిన బ్రేక్‌ దర్శనాలు రద్దు చేశామని.. 11న బ్రేక్‌ దర్శనానికి సిఫార్సు లేఖలు స్వీకరించబోమని వెల్లడించింది.
