'' గత ప్రభుత్వాలు కూడా సంస్కరణలు తీసుకొచ్చాయి. కానీ, వాటి ఫలితాల్లో స్థిరత్వం లేదు. గత తొమ్మిదేళ్లలో తీసుకొచ్చిన సంస్కరణలు స్థిరమైన ఫలితాలనిచ్చాయి. కొవిడ్‌ సమయంలోనూ సంస్కరణలు చేపట్టాం. వాటిని సవాలుగా కాకుండా అవకాశంగా భావించాం'' అని సీతారామన్‌ అన్నారు. కొవిడ్‌ కాలం నాటి పరిస్థితులను గుర్తు చేసిన సీతారామన్‌.. విద్య, వైద్య రంగంగాల్లో పెట్టుబడులపై దృష్టిపెట్టడమే భారత్‌ ప్రాధాన్యత అని చెప్పారు. ప్రపంచ దేశాలన్నీ దీనిపై దృష్టి సారించాలన్నారు. లేదంటే అభివృద్ధి చెందిన దేశాల్లోనూ ఆరోగ్య వ్యవస్థలు పూర్తిగా దెబ్బతింటాయని హెచ్చరించారు. ఈ రంగాన్ని బలోపేతం చేసుకోకపోతే.. ఆరోగ్య సంక్షోభ పరిస్థితులు తలెత్తే ప్రమాదముందన్నారు. మరోవైపు దేశంలో ద్రవ్యోల్బణాన్ని నియంత్రించేందుకు, ప్రభుత్వ రాబడిని పెంచుకునేందుకు కేంద్ర ప్రభుత్వం స్థిరమైన విధానాలను అవలంబిస్తోందని నిర్మలా సీతారామన్‌ చెప్పారు. అలాగని పన్నులు పెంచేసి ప్రజలపై భారం పెట్టే ఆలోచన లేదని తేల్చి చెప్పారు. ధరలు పెంచినంత మాత్రాన ద్రవ్యోల్బణాన్ని పూర్తిగా నియంత్రించలేమని అన్నారు. ద్రవ్యోల్బణాన్ని నియంత్రించే క్రమంలో బ్యాంకులు వృద్ధిని కూడా దృష్టిలో ఉంచుకొని వ్యవహరించాలన్నారు. టమాటా, కూరగాయల ధరల పెరుగుదలతో రిటైల్‌ ద్రవ్యోల్బణం జులై నెలలో 7.44శాతం ఎగబాకి 15 నెలల గరిష్ఠానికి చేరుకున్న సంగతి తెలిసిందే. బిజినెస్‌ 20 లేదా బీ20 అనేది జీ20 చర్చావేదికల్లో (ఫోరమ్‌) ఒకటి. గ్లోబల్‌ బిజినెస్‌ కమ్యూనిటీకి ఇది ప్రాతినిధ్యం వహిస్తుంది. 2010లో దీనిని ఏర్పాటు చేశారు.
