ప్రతిపక్షాల ఆందోళనల మధ్యే వివాదాస్పదమైన 'ఢిల్లీ సర్వీసుల బిల్లు' ఆమోదం పొందింది. తాజాగా ఈ బిల్లుకు రాష్ట్రపతి ద్రౌపది ముర్ము కూడా ఆమోదం తెలిపారు. దీంతో ఢిల్లీ సర్వీసుల చట్టం (ఢిల్లీ సర్వీసెస్‌ యాక్ట్‌)గా అమల్లోకి వచ్చింది. దేశరాజధాని ఢిల్లీలో ఐఏఎస్‌లతో సహా, ప్రభుత్వాధికారుల బదిలీలు, నియామకాలపై ఎన్నికైన ప్రభుత్వానికే నియంత్రణ ఉంటుందని ఈ ఏడాది మే నెలలో సుప్రీంకోర్టు కీలక తీర్పును వెలువరించింది. అయితే ఈ తీర్పు వచ్చిన మరుసటిరోజే అధికారుల బదిలీలు కేంద్రం నియంత్రణలో ఉండేలా మోడీ ప్రభుత్వం ఓ ఆర్డినెన్స్‌ తీసుకొచ్చింది. ఈ ఆర్డినెన్స్‌పై ఆమ్‌ఆద్మీ పార్టీ ప్రభుత్వం తీవ్రంగా మండిపడింది. పార్లమెంట్‌ సమావేశాల్లో ఈ బిల్లు ప్రవేశపెట్టినా.. వ్యతిరేకంగా ఓటు వేయమని ఢిల్లీ సిఎం అరవింద్‌ కేజ్రీవాల్‌ ప్రతిపక్షనేతల్ని కోరారు. వర్షాకాల సమావేశాల్లో ఆర్డినెన్స్‌ స్థానంలో ఢిల్లీ సర్వీసుల బిల్లును కేంద్రం ప్రవేశపెట్టింది. ఈ బిల్లును ప్రతిపక్షాల కూటమి 'ఇండియా' వ్యతిరేకించింది. సభల్లో ప్రతిపక్షాల నిరసనల మధ్యే ఈ బిల్లు ఆమోదం పొందింది. తాజాగా రాష్ట్రపతి సంతకంతో ఈ బిల్లు చట్టంగా మారింది. ఢిల్లీ సర్వీసుల బిల్లుతోపాటు డిజిటల్‌ పర్సనల్‌ డేటా ప్రొటెక్షన్‌ బిల్లు, జనన, మరణాల నమోదు (సవరణ) బిల్లు, జన్‌ విశ్వాస్‌ (సవరణ) బిల్లుకు రాష్ట్రపతి ఆమోదం తెలిపారు. దీంతో ఇవి కూడా చట్టంగా మారాయి.
No comments:
Post a Comment