తగ్గనున్న సిమెంట్ ధరలు ?

జూన్ రెండో వారంలో కేంద్ర ఆర్థిక మంత్రి అధ్యక్షతన రాష్ట్రాలు, కేంద్ర పాలిత ప్రాంతాల ప్రతినిధులతో కూడిన జీఎస్‌టీ కౌన్సిల్ సమావేశం  జరగనుంది. ఈ సమావేశంలో సిమెంట్‌పై జీఎస్‌టీ రేట్లను 18 శాతానికి తగ్గించే అంశంపై జీఎస్‌టీ కౌన్సిల్ చర్చించే అవకాశం ఉంది.  ప్రస్తుతం సిమెంట్‌పై గూడ్స్ అండ్ సర్వీసెస్ ట్యాక్స్ 28 శాతంగా ఉంది. ప్రస్తుతం, కేంద్ర మరియు రాష్ట్ర ప్రభుత్వాల రెవెన్యూ అధికారులతో కూడిన ఫిట్‌మెంట్ కమిటీ సిమెంట్‌పై జీఎస్‌టీ రేటును 18 శాతానికి తగ్గించే ప్రతిపాదనపై కసరత్తు చేస్తోంది. అంతకుముందు, సిబిఐసి చైర్‌పర్సన్ వివేక్ జోహ్రీ మాట్లాడుతూ, రేట్ల సవరణల ప్రభావాలను అధ్యయనం చేసే ఫిట్‌మెంట్ కమిటీ, జీఎస్‌టీ కౌన్సిల్‌కు నివేదికను సమర్పించే ముందు సిమెంట్‌పై 28 శాతం జీఎస్‌టీ తగ్గింపుపై చర్చించనుంది.  ఫిబ్రవరిలో ఆర్థిక మంత్రి నిర్మలా సీతారామన్ కూడా సిమెంట్‌పై జీఎస్‌టీ రేటు తగ్గింపును పరిగణనలోకి తీసుకునేందుకు ప్రభుత్వం సిద్ధంగా ఉంటుందని చెప్పిన సంగతి తెలిసిందే. జూన్ రెండోవారంలో జరగనున్న 50వ జీఎస్‌టీ కౌన్సిల్ సమావేశంలో సిమెంట్‌పై జీఎస్‌టీ అంశంపై చర్చ జరిగే అవకాశం ఉంది.  ఇది కాకుండా, ఆన్‌లైన్ గేమింగ్‌పై విధించే జీఎస్‌టీ రేటు అంశంపైనా చర్చించే అవకాశం ఉంది. ఫిబ్రవరిలో జరిగిన 49వ జీఎస్టీ కౌన్సిల్ సమావేశంలో పెన్సిల్ షార్పనర్లపై జీఎస్టీ రేటును 18 శాతం నుంచి 12 శాతానికి తగ్గించిన సంగతి తెలిసిందే. లిక్విడ్ బెల్లంపై జీఎస్టీ రేటును 18 శాతం నుంచి నిల్ లేదా 5 శాతానికి తగ్గించాలని, అలాగే కొన్ని ట్రాకింగ్ పరికరాలపై పన్ను రేటును తగ్గించాలని నిర్ణయించింది.