ఢిల్లీలోని మయూర్ విహార్‌కు చెందిన బీజేపీ యువ నాయకుడు జీతు చౌదరిని దుండగులు కాల్చి చంపారు. ఆయన ఇంటి బయట బుధవారం రాత్రి 8 గంటల సమయంలో కాల్పులు జరిగినట్లు తెలుస్తుంది. గాజీపుర్ ప్రాంతంలోని అతని నివాసం వద్దే గుర్తుతెలియని వ్యక్తులు బైక్పై వచ్చి కాల్చి చంపారు. ఈ ఘటనపై కేసు నమోదు చేసిన పోలీసులు దర్యాప్తు చేపడుతున్నారు. దేశ రాజధానిలో.. అది కూడా ఆరు రౌండ్ల కాల్పులు జరపడం ఇప్పుడు దేశంలోనే సంచలనంగా మారింది. హత్య కాబడిన జీతూ చౌదరి మయూర్ విహార్ జిల్లా బీజేపీకు సెక్రటరీగా బాధ్యతలు నిర్వహిస్తున్నారు. హత్య జరిగిన ఘటనాస్థలం నుంచి ఖాళీ క్యాట్రిడ్జులు సహా పలు కీలక ఆధారాలను స్వాధీనం చేసుకున్న పోలీసులు ఈ ఘటనపై కేసు నమోదు చేసి సీసీటీవీ ఫుటేజ్ల ఆధారంగా నిందితులను పట్టుకునేందుకు ప్రయత్నిస్తున్నారు. హంతకులను వీలైనంత త్వరగా అరెస్టు చేయాలని ఢిల్లీ పోలీసులను కోరారు.
