హాల్మార్క్ గుర్తులో మూడు విషయాలను ముందుగా తనిఖీ చేయాలి. త్రిభుజాకారంలో ఉన్న BIS (బ్యూరో ఆఫ్ ఇండియన్ స్టాండర్డ్స్) గుర్తు ఉందో లేదో చూసుకోవాలి. స్వచ్ఛతను సూచించే క్యారేటేజ్‌ (22K915) ఉందో లేదో చూడాలి. దీంతోపాటు ఏహెచ్‌సీ (అస్సేయింగ్ హాల్మార్కింగ్ కేంద్రం) గుర్తు ఉందో లేదో గమనించాలి. బీఐఎస్ లైసెన్స్ చూపించాలని కూడా దుకాణదారుడిని అడగొచ్చు. బీఐఎస్ మార్గదర్శకాల ప్రకారం.. ఆభరణాల లైసెన్స్‌ను కొనుగోలుదారుల‌కు చూపించాల్సి ఉంటుంది. అందులో ఉన్న చిరునామాలోనే షాప్ ఉందో లేదో గమనించండి. బిల్లు తీసుకునేటప్పుడు హాల్మార్కింగ్ ఛార్జీలను కూడా పేర్కొనమని అడగొచ్చు. హాల్మార్క్ చేసిన వస్తువుకు నగల దుకాణదారుడి నుంచి ఏహెచ్‌సీలు రూ.35 వసూలు చేస్తారు. మీరు సొంతంగా కూడా ఏహెచ్‌సీ వ‌ద్ద ఆభరణాలను తనిఖీ చేసుకోవచ్చు. బీఐఎస్ వెబ్‌సైట్‌లో ఏహెచ్‌సీల జాబితాను చూడొచ్చు. స‌స్పెండ్ చేసిన ఏహెచ్‌సీ, లైసెన్స్ ర‌ద్దు చేసిన వాటి వివ‌రాలు కూడా ఇక్క‌డ ల‌భిస్తాయి. కొంత మొత్తం ఛార్జీల‌తో వినియోగ‌దారులు త‌మ ఆభరణాల స్వచ్ఛతను తెలుసుకునేందుకు ఇవి ఉప‌యోగ‌ప‌డ‌తాయి. పరీక్షించిన తర్వాత ఆభరణాల స్వచ్ఛతను సూచిస్తూ నివేదికను ఏహెచ్‌సీ జారీ చేస్తుంది. ఆభరణాలు తక్కువ స్వచ్ఛత ఉన్నట్లు తేలితే అంత‌కుముందు ధ్రువీకరించినందుకు సదరు ఏహెచ్‌సీ వినియోగదారు ఫీజును తిరిగి చెల్లించాలి. స్వచ్ఛత లేక‌పోతే మీకు విక్ర‌యించిన దుకాణ‌దారుని వద్దకు వెళ్లి ఆ ప‌త్రాల‌తో ప్ర‌శ్నించేందుకు అవ‌కాశం ఉంటుంది. అలాంటి సందర్భాల్లో నగల వ్యాపారి పరిహారం కూడా చెల్లించాల్సి వ‌స్తుంది.
