కలకత్తా హైకోర్టు జనవరి 5న ఎన్‌ఫోర్స్‌మెంట్ డైరెక్టరేట్ (ఈడీ), సెంట్రల్ ఆర్మ్‌డ్ పోలీస్ ఫోర్సెస్ బృందాలపై జరిగిన దాడికి సంబంధించిన సందేస్‌ఖాలీ హింస కేసును సెంట్రల్ బ్యూరో ఆఫ్ ఇన్వెస్టిగేషన్ (సీబీఐ)కి బదిలీ చేస్తూ ఇచ్చిన ఆదేశాలపై జోక్యం చేసుకోవడానికి సుప్రీంకోర్టు సోమవారం నిరాకరించింది. రాష్ట్ర పోలీసు యంత్రాంగంపై హైకోర్టు చేసిన వ్యాఖ్యలను అత్యున్నత న్యాయస్థానం కొట్టివేసింది. ఈ కేసులో ప్రధాన నిందితుడు షాజహాన్‌ షేక్ అరెస్టు ఎందుకు ఆలస్యం అయిందని సుప్రీం రాష్ట్ర ప్రభుత్వాన్ని ప్రశ్నించింది. సందేశ్‌ఖాలీలో ఈడీ అధికారులపై దాడికి సంబంధించిన దర్యాప్తును సెంట్రల్ బ్యూరో ఆఫ్ ఇన్వెస్టిగేషన్ (సీబీఐ)కి బదిలీ చేయాలని, నిందితుడిని అప్పగించాలని కలకత్తా హైకోర్టు పశ్చిమ బెంగాల్‌ పోలీసులను ఆదేశించింది. దీనికి వ్యతిరేకంగా పశ్చిమబెంగాల్ ప్రభుత్వం సుప్రీంకోర్టులో స్పెషల్ లీవ్ పిటీషన్(SLP) దాఖలు చేసింది. దర్యాప్తును సీబీఐకి బదిలీ చేయాలనే హైకోర్టు ఉత్తర్వులకు వ్యతిరేకంగా సుప్రీంలో సవాలు చేసింది. హైకోర్టు ఆదేశాల ఆధారంగా అతనిపై మూడు ఎఫ్‌ఐఆర్‌లను సీబీఐ నమోదు చేసింది.
