సోనియా గాంధీ హాజరుకానున్న విజయభేరి సభలో పలువురు ముఖ్య నేతలు కాంగ్రెస్ పార్టీలో చేరనున్నట్టు తెలుస్తున్నది. ఇప్పటికే తుమ్మల నాగేశ్వర్రావుతో కాంగ్రెస్నేతలు పలు మార్లు చర్చలు జరిపారు. కాంగ్రెస్ పార్టీలోకి రావాల్సిందిగా ఆహ్వానించారు. శుక్రవారం కూడా పీసీసీ చీఫ్ రేవంత్ రెడ్డి, సీఎల్పీ నేత భట్టి విక్రమార్క, పీసీసీ ప్రచార కమిటీ కో చైర్మన్ పొంగులేటి శ్రీనివాస్ రెడ్డి, జానారెడ్డి కుమారుడు రఘువీర్ రెడ్డి, రోహిన్ రెడ్డి ఆయనతో భేటీ అయ్యారు. తుమ్మల నివాసంలో దాదాపు గంటపాటు సాగిన ఈ సమావేశంలో ఆయన్ను కాంగ్రెస్ పార్టీలోకి రావాల్సిందిగా వాళ్లు కోరినట్టు సమాచారం. సోనియా గాంధీ సభ నేపథ్యంలో పార్టీలో చేరితే బాగుంటుందని చెప్పినట్టు తెలిసింది. కాంగ్రెస్లో చేరే విషయంలో తుమ్మల నాగేశ్వర్ రావు కొంతకాలంగా డైలమాలో ఉన్నారు. అనుచరులు, కార్యకర్తలతో ఎన్నో మీటింగులను పెట్టారు. ఖమ్మం జిల్లాకు చెందిన కాంగ్రెస్ ముఖ్య నేతలూ పలుమార్లు ఆయనతో చర్చలు జరిపారు. రేవంత్, భట్టి, పొంగులేటి, రేణుకా చౌదరి తదితర నేతలు ఆయన్ను కన్వీన్స్ చేసే ప్రయత్నం చేశారు. ఈ నేపథ్యంలోనే టికెట్ హామీ గురించి తుమ్మల స్పష్టత కోరుతున్నట్టు పార్టీ వర్గాలంటున్నాయి. పాలేరు సీటును తుమ్మల ఎక్స్పెక్ట్ చేస్తున్నారు. కాంగ్రెస్ పెద్దలు మాత్రం ఖమ్మం నుంచి బరిలోకి దిగాల్సిందిగా ఆయన్ను ఒప్పించేందుకు ప్రయత్నించినట్లు పార్టీ వర్గాలు అంటున్నాయి. ఇటు తుమ్మల చేరిక విషయంపై డీకే శివకుమార్తోనూ పార్టీ నేతలు చర్చించినట్టు తెలిసింది. శనివారం మంచి రోజు ఉన్నందున తొలుత పార్టీ కండువా కప్పుకుని.. ఆదివారం తుక్కుగూడలో జరిగే సోనియా సభలో అధికారికంగా పార్టీలో తుమ్మల చేరే అవకాశాలున్నాయని కాంగ్రెస్ వర్గాలు చెప్తున్నాయి. సోనియా గాంధీ సభలోనే మరికొందరు నేతలు కూడా కాంగ్రెస్ పార్టీలో చేరే అవకాశం ఉన్నట్టు తెలుస్తున్నది. బీఆర్ఎస్ టికెట్ వస్తుందని ఆశించి భంగపడ్డ నకిరేకల్ మాజీ ఎమ్మెల్యే వేముల వీరేశం కాంగ్రెస్ కండువా కప్పుకునే అవకాశాలు కన్పిస్తున్నాయి. ఆయనతోనూ కాంగ్రెస్ నేతలు చర్చించి టికెట్ హామీని ఇచ్చినట్టు తెలుస్తున్నది. ఇక, ఇటీవల రేవంత్తో భేటీ అయిన జిట్టా బాలకృష్ణా రెడ్డి, యెన్నం శ్రీనివాస్ రెడ్డి కూడా సోనియా సభలోనే కాంగ్రెస్లో చేరుతారన్న టాక్ వినిపిస్తున్నది. వేముల వీరేశం నకిరేకల్ టికెట్ను ఆశిస్తున్నారు. జిట్టా బాలకృష్ణారెడ్డి భువనగిరి టికెట్, యెన్నం శ్రీనివాస్రెడ్డి మహబూబ్నగర్ టికెట్ను ఆశిస్తున్నారు. అయితే, వారికి టికెట్ హామీనిచ్చినా.. ఏ నియోజకవర్గం నుంచి అన్నది మాత్రం వారికి పార్టీ నేతలు హామీ ఇవ్వలేదని తెలుస్తున్నది.
No comments:
Post a Comment