కర్ణాటకలోని చిక్కబళ్లాపుర ప్రాంతానికి చెందిన అబ్బాయి, అమ్మాయి క్లాస్‌మేట్స్, వారు రెస్టారెంట్‌లో కలిసి భోజనం చేయడం పట్ల కొందరు గొడవ సృష్టించి ఇద్దరినీ విపరీతంగా వేధించారు. ఈ తతంగమంతా కెమెరాకు చిక్కగా, దానికి సంబంధించిన వీడియో ఇప్పుడు సోషల్ మీడియాలో వైరల్ అవుతోంది. ఇందులో అబ్బాయి హిందువు అని, అమ్మాయి ముస్లిం అని చెప్పారు. వారిద్దరూ రెస్టారెంట్‌లో కూర్చొని భోజనం చేస్తుండగా, కొంతమంది ముస్లిం వ్యక్తులు లోపలికి వచ్చి, హిందూ అబ్బాయితో కలిసి భోజనం చేయడంపై అమ్మాయిని ప్రశ్నించడం ప్రారంభించారు. పబ్లిక్ ప్లేస్‌లో హిందూ అబ్బాయితో కనిపించడం తప్పు అని ఆ అమ్మాయిని తిట్టడం వీడియోలో కనిపిస్తోంది. ఆ అమ్మాయి జనాల ఒత్తిడికి లోనుకాకుండా వారికి తగిన సమాధానం చెబుతూ కనిపించింది. ఆమె తన హక్కుల కోసం పోరాడడమే కాకుండా తన వ్యక్తిగత జీవితంలో జోక్యం చేసుకున్నందుకు జనాలను మందలించింది. అదే సమయంలో, బాలిక ఈ విషయంపై సమీపంలోని పోలీస్ స్టేషన్‌లో ఫిర్యాదు చేసింది. చర్యలు తీసుకున్న పోలీసులు శుక్రవారం ఉదయం ఎఫ్‌ఐఆర్ నమోదు చేసి దర్యాప్తు ప్రారంభించారు. రాష్ట్రంలో నైతిక పోలీసింగ్ ఉండకూడదని కర్ణాటక ముఖ్యమంత్రి సిద్ధరామయ్య ఇటీవల పోలీసు అధికారులతో తన తొలి సమావేశంలో చెప్పిన తరుణంలో ఈ విషయం తెరపైకి రావడం విశేషం.
