మణిపూర్ లో హింస చెలరేగింది. సైన్యం, అస్సాం రైఫిల్స్ రంగంలోకి దిగాయి. ప్రజలకు రక్షణ కల్పించేందుకు భారీగా మోహరించాయి. గ్రామాల్లోని 7వేల 500 మంది ప్రజల్ని సురక్షిత ప్రాంతాలకు తరలించారు. గిరిజనుల ఆందోళన క్రమంలో చెలరేగిన హింసను చల్లార్చే ప్రయత్నం సైన్యం చేస్తోంది. హింసాత్మక ప్రాంతాల నుంచి యుద్ధ ప్రాతిపదికన ప్రజల్ని తరలిస్తున్నారు. సురక్షిత ప్రాంతాలకు తరలిస్తూ ఆశ్రయం కల్పిస్తున్నారు. రాష్ట్ర పోలీసులతో పాటు, ఆర్మీ, అస్సాం రైఫిల్స్ గత రాత్రి నుంచి మోహరించి ఉన్నాయి. హింసను అదుపులోకి తీసుకొస్తున్నాయి. పరిస్థితిని అదుపులో ఉంచేందుకు ఫ్లాగ్‌మార్చ్‌లు నిర్వహిస్తున్నారు. రాష్ట్ర జనాభాలో 53 శాతం ఉన్న గిరిజనేతరుల డిమాండ్‌ను నిరసిస్తూ ఆల్ ట్రైబల్ స్టూడెంట్ యూనియన్ మణిపూర్ బుధవారం రాష్ట్రంలోని 11 జిల్లాల్లో ‘గిరిజన సంఘీభావ యాత్ర’ నిర్వహించింది. అక్కడ మెయిటీ కమ్యూనిటీ ఎస్టీ హోదాను డిమాండ్ చేస్తోంది. అందుకు సంబంధించిన సిఫారసులను నాలుగు వారాల్లోగా కేంద్రానికి పంపాలని మణిపూర్ హైకోర్టు తీర్పు ఇచ్చింది. ఆ మేరకు గత నెలలో రాష్ట్ర ప్రభుత్వాన్ని కోరడంతో గిరిజన సంఘీభావం యాత్ర జరిగింది. చురాచంద్‌పూర్ జిల్లాలోని టోర్‌బంగ్ ప్రాంతంలో కవాతు సందర్భంగా, సాయుధ గుంపు మెయిటీ కమ్యూనిటీకి చెందిన వ్యక్తులపై దాడి చేసింది. ఈ సంఘటన లోయ జిల్లాల్లో ప్రతీకార దాడులకు దారితీసింది. దాని ప్రభావం కారణంగా రాష్ట్రవ్యాప్తంగా హింస చెలరేగింది. టోర్‌బంగ్‌లో మూడు గంటలకు పైగా కొనసాగిన అగ్నిప్రమాదంలో అనేక దుకాణాలు , ఇళ్లు దహనం అయ్యాయి. "విలువైన ప్రాణాలు పోయాయి, ఆస్తుల నష్టంతో పాటు, ఇది చాలా దురదృష్టకరం" అని ముఖ్యమంత్రి ఎన్ బీరేన్ సింగ్ అన్నారు. సమాజంలోని "అపార్థం" వల్లే ఈ హింస జరిగిందని సింగ్ అన్నారు. హింసకు పాల్పడుతున్న వ్యక్తులు మరియు సమూహాలపై కఠిన చర్యలు తీసుకోవాలని కేంద్ర మరియు రాష్ట్ర బలగాలను ఆదేశించినట్లు ఆయన తెలిపారు.
No comments:
Post a Comment