గ్లోబల్ మార్కెట్ల ఒడిదుడుకులు, గ్లోబల్ క్రూడ్ ఆయిల్ ధరలు పుంజుకోవడంతో పాటు భారతదేశ కరెంట్ ఖాతా లోటు, ద్రవ్యోల్బణం ఆందోళలు, తదితర కారణాల రీత్యా రూపాయి డాలర్‌తో మంగళవారం 78.37 వద్ద ఆల్ టైం కనిష్టానికి చేరింది. అమెరికా డాలర్‌తో రూపాయి మారకం విలువ తొలుత 78.68కి పడిపోయింది. సోమవారం రూపాయి 4పైసలు క్షీణించి యూఎస్ డాలర్‌తో పోలిస్తే జీవితకాల కనిష్ట స్థాయి 78.37 వద్ద ముగిసింది. డాలర్ ఇండెక్స్‌తో పోలిస్తే భారతీయ రూపాయి తాజా రికార్డు కనిష్ట స్థాయికి చేరుకుంది. ఈక్విటీ మార్కెట్లలో అమ్మకాల కొనసాగింపు, పెరిగిన ముడి చమురు ధరల కారణంగా నికర దిగుమతిదారుల ఆర్థిక బ్యాలెన్స్‌పై ఇది ప్రభావం చూపి తగ్గవచ్చు. పెరుగుతున్న ముడి చమురు ధరలు ద్రవ్యోల్బణంపై మరోసారి ఆందోళన కలిగిస్తున్నాయి. విదేశీ పోర్ట్‌ఫోలియో ఇన్వెస్టర్లు గత వరుసగా తొమ్మిది నెలల నుంచి దేశం నుంచి డబ్బును ఉపసంహరించుకోవడం కూడా దేశీయ కరెన్సీపై ఒత్తిడి తెచ్చే అవకాశం ఉందని విశ్లేషకులు తెలిపారు. జూన్‌లో ఇప్పటివరకు విదేశీ పెట్టుబడిదారులు రూ. 38,500 కోట్లను వెనక్కి తీసుకున్నారు. జూన్ 10, 2022తో ముగిసిన వారానికి భారతదేశ విదేశీ మారక నిల్వలు 4.59 బిలియన్ డాలర్లు క్షీణించి 596.46 బిలియన్ డాలర్లకు చేరుకున్నాయని ఆర్‌బీఐ డేటా వెల్లడించింది. ఇదిలాఉంటే దేశీయ మార్కెట్లలో ఎఫ్‌ఐఐల విక్రయాలు కూడా రూపాయిపై ఒత్తిడి పెంచుతున్నాయి. స్టాక్ ఎక్స్ఛేంజ్ డేటా ప్రకారం, ₹1,278.42 కోట్ల విలువైన షేర్లను ఆఫ్‌లోడ్ చేయడంతో విదేశీ సంస్థాగత పెట్టుబడిదారులు సోమవారం క్యాపిటల్ మార్కెట్‌లో నికర అమ్మకందారులుగా ఉన్నారు. ఈ వారం రూపాయి అస్థిరంగా ఉండవచ్చని అంచనా వేస్తున్నారు. ముడి చమురు ధరలు పుంజుకోవడం, రష్యాపై మరిన్ని ఆర్థిక ఆంక్షల చర్చలు రూపాయి విలువను తగ్గించాయి. దేశీయ మార్కెట్లలో ఎఫ్‌ఐఐల విక్రయాలు కూడా రూపాయిపై ఒత్తిడి పెంచుతున్నాయి. రష్యాపై మరింత ఆర్థిక ఆంక్షలు ప్రపంచ ఇంధన ధరలను పెంచుతాయి. అభివృద్ధి చెందుతున్న మార్కెట్ కరెన్సీలపై ఒత్తిడిని కలిగిస్తాయని రాహుల్ కలంత్రి అన్నారు.
