ఢిల్లీలోని భారత్ మండపంలో విద్యార్థులతో పరీక్షల (పరీక్షా పే చర్చ 2024) గురించి ప్రధానమంత్రి నరేంద్ర మోడీ సోమవారం చర్చించారు. పరీక్షల టెన్షన్‌ను తొలగించేందుకు విద్యార్థులతో ప్రధానమంత్రి ముచ్చటించారు. దేశవ్యాప్తంగా విద్యార్థులు, తల్లిదండ్రులు, ఉపాధ్యాయులతో సంభాషించారు. ప్రధాన మంత్రి అనేక ఉదాహరణలు ఇవ్వడం ద్వారా పిల్లలను ప్రేరేపించారు. ఎలాంటి ఒత్తిడినైనా ఎదుర్కొనేందుకు సిద్ధంగా ఉండాలని చెప్పారు. ప్రధాని కరోనా కాలాన్ని కూడా ప్రస్తావించారు. కష్ట సమయాలను ధైర్యంగా ఎలా ఎదుర్కోవాలో చెప్పారు. ప్రధాని మోదీ మాట్లాడుతూ.. “కరోనా కాలంలో దేశ ప్రజలను చప్పట్లు కొట్టమని కోరాను. అయితే ఇది కరోనాను తొలగించదు కానీ సమిష్టి శక్తిని పెంచుతుంది. ఆట స్థలానికి వెళ్లినవారు కొన్నిసార్లు విజేతగా తిరిగి వస్తారు. చాలా మంది ఓటమి పాలవుతారు. ఎవరికి ఏ శక్తి ఉందో దానిని సక్రమంగా వినియోగించుకోవాలి. మంచి ప్రభుత్వాన్ని నడపడానికి, ఈ సమస్యలను పరిష్కరించడానికి సరైన సమాచారం, మార్గదర్శకత్వం క్షేత్రస్థాయి నుంచి రావాలి.” అని ప్రధాని చెప్పారు. ఎంతటి క్లిష్టపరిస్థితులు ఎదురైనా మీరు భయాందోళనలకు గురికావద్దని ప్రధాని పిల్లలకు సూచించారు. దాన్ని ఎదుర్కొని విజయం సాధించాలని సూచనలు చేశారు. ప్లేట్‌ను కొట్టడం లేదా దీపం వెలిగించడం వల్ల కరోనా నుండి ఉపశమనం లభించదని నాకు కూడా తెలుసు అని ప్రధాని మోడీ అన్నారు. దీని వల్ల కరోనా వ్యాధి నయం కాదు. కానీ కరోనాపై యుద్ధంలో దేశ ప్రజలను ఏకం చేయడానికి మేము దీన్ని చేశాము. దేశం మొత్తం ప్రజలు ఒకే సమయంలో చప్పట్లు కొట్టి, దీపాలు వెలిగించినప్పుడు, అది వారిలో ఐక్యతా భావాన్ని కలిగించింది. తాను కరోనాపై ఒంటరి పోరాటం చేయడం లేదని గ్రహించారు. దేశం మొత్తం కరోనాను ఎదుర్కొంటోంది. అందరూ కలిసికట్టుగా పోరాడితేనే సమస్య నుంచి బయటపడవచ్చన్నారు. కరోనా వైరస్ ప్రపంచ మహమ్మారి అని ప్రధాని అన్నారు. ప్రపంచం మొత్తం ఆందోళన చెందిందని ప్రధాని మోడీ పేర్కొన్నారు. నేను ఒంటరిగా ఉన్నానని ఎప్పుడూ భావించలేనని ప్రధాని అన్నారు. “140 కోట్ల మంది దేశప్రజలు నాతో ఉన్నారని నేను నమ్ముతున్నాను. ప్రతి సవాళ్లను అధిగమిస్తాం. ఇది నాలో ఉన్న నమ్మకం. అందుకే దేశాన్ని ముందుకు తీసుకెళ్లేందుకు నా శక్తిని వెచ్చిస్తున్నాను. అందరూ కలిసికట్టుగా ఎదుర్కొంటే ఈ కష్టకాలం నుంచి బయటపడతాం. అందుకే టీవీల్లో కనిపిస్తూనే ఉన్నాను. ప్రజలతో మాట్లాడుతూనే ఉన్నాను.” అని ప్రధాని పేర్కొన్నారు.
