1950 తొలినాళ్లలో క్రికెట్ స్టేడియం, క్లబ్ హౌస్ నిర్మాణం కోసం బాంబే ప్రావిన్స్ 16.5 ఎకరాల భూమిని క్రికెట్ క్లబ్ ఆఫ్ అహ్మదాబాద్ కు బహుమతిగా ఇచ్చింది. సీసీఏ ప్రాజెక్టు నిర్మాణం కోసం ఆ భూమిని అహ్మదాబాద్ మున్సిపల్ కార్పొరేషన్కు అప్పగించింది. దీంతో అప్పటి నగర మేయర్ సేఠ్ చినుభాయ్ చిమాన్ భాయ్ ప్రపంచ ప్రఖ్యాతి గాంచిన ఆర్కిటెక్ట్ ఛార్లెస్ కొరియాకు నిర్మాణ బాధ్యతలు అప్పజెప్పారు. ఆయన 50 వేల సీటింగ్ కెపాసిటీతో అద్భుతమైన స్టేడియాన్ని నిర్మించారు. దేశంలోనే తొలి పిల్లర్ లెస్ స్టేడియంగా ఇది గుర్తింపు పొందింది. ఇంటర్నేషనల్ లెవల్లో పేరున్న సర్థార్ వల్లభాయ్ పటేల్ స్టేడియం కాలక్రమంలో మరుగునపడిపోయింది. నిధుల కొరత, నిర్వాహణ లోపంతో అక్కడక్కడ పగులు వచ్చాయి. సీటింగ్ ఏరియా చాలా వరకు ధ్వసమైంది. నిర్మాణంలో ఉపయోగించిన ఇనుము తప్పుపట్టిపోయింది. గేట్లు కూడా కూలిపోయే దశకు చేరుకున్నారు. ఒక్కమాటలో చెప్పాలంటే స్టేడియం కుప్పకూలే దశకు చేరుకుంది. అహ్మదాబాద్ మున్సిపల్ కార్పొరేషన్ తొలుత స్టేడియంకు రిపేర్లు చేయించాలని భావించినా అందుకు కోట్ల రూపాయలు ఖర్చు చేసేకన్నా ఆ నిర్మాణాన్ని కూల్చి కొత్త స్టేడియం నిర్మించడం బెటర్ అన్న నిర్ణయానికి వచ్చినట్లు తెలుస్తోంది. నిజానికి నరేంద్రమోడీ స్టేడియం అందుబాటులోకి వచ్చాక ఈ స్టేడియంను స్థానికులు కల్చరల్ ఈవెంట్ల కోసం వాడుకుంటున్నారు. అయితే ఇప్పుడు ఆ కార్యక్రమాలకు సైతం వాడుకునే పరిస్థితిలో నిర్మాణం లేదని ఇంజనీర్లు చెప్పడంతో 63 ఏండ్ల చరిత్ర కలిగిన సర్ధార్ వల్లభాయ్ పటేల్ స్టేడియాన్ని కూల్చివేయాలని అధికారులు నిర్ణయించినట్లు సమాచారం.
