ఢిల్లీలోని కృష్ణానగర్‌లో జరిగిన జంట హత్యల కేసులో పోలీసులు పెద్ద విజయం సాధించారు. ఈ కేసులో కంప్యూటర్ టీచర్, మ్యూజిక్ కంపోజర్‌ను ఢిల్లీ పోలీసులు అరెస్ట్ చేశారు. నిందితుల్లో ఒకరైన కిషన్ సింగ్ (28) మృతి చెందిన బాలికకు కంప్యూటర్ క్లాసులు చెప్పేవాడని తెలిపారు. మరో నిందితుడు అంకిత్ కుమార్ ఓ వెబ్ సిరీస్‌లో పాట కూడా పాడాడని పోలీసులు తెలిపారు. భోజ్‌పురి చిత్రాల్లో పాటలు పాడడమే కాకుండా సంగీత స్వరకర్త కూడా. పూర్తి వివరాలలోకి వెళితే, ఢిల్లీలోని కృష్ణానగర్‌లో నివసించే 76 ఏళ్ల రాజ్‌రాణి ఆకాశవాణిలో పనిచేసింది. రాజారాణి కూడా తబలా కళాకారిణి. రాజారాణి కుమార్తె 39 ఏళ్ల గిన్ని కరార్ చెవిటి, మూగ. కూతురు గిన్నికి వినడానికి, మాట్లాడడానికి ఇబ్బందిపడేది. రాజారాణి కూతురు గిన్ని ఫైన్ ఆర్ట్‌లో ఎంఏ చేసింది. కృష్ణ నగర్ ఇంట్లో ఈ తల్లీ కూతురు మాత్రమే ఉండేవారు. రాజారాణికి మరో ఇద్దరు కూతుళ్లు వేరువేరుగా ఉంటున్నారు. వృద్ధురాలు రాజారాణి భర్త అప్పటికే మృతి చెందాడు. వృద్ధురాలు రాజారాణి తన కుమార్తెకు చదువు చెప్పేందుకు ఇంటర్నెట్‌లో వెతికి కంప్యూటర్ టీచర్‌ను నియమించుకుంది. కిషన్ సింగ్ అనే టీచర్ వృద్ధురాలి ఇంటికి వచ్చి గిన్నికి కంప్యూటర్ నేర్పించేవాడు. గిన్నికి బోధించేటప్పుడు ఇంటి యజమాని బ్యాంకు ఖాతాలో 50 లక్షల రూపాయలు ఉండటాన్ని గమనించాడు. వృద్ధురాలిని, ఆమె కూతురిని హతమార్చేందుకు కంప్యూటర్ టీచర్ పక్కా ప్లాన్ వేశాడు. కిషన్ సింగ్, అతని సహచరుడు చాలా రోజులు రెక్కీ నిర్వహించారు. తర్వాత అవకాశం రావడంతో ఇద్దరినీ హతమార్చి ఇంట్లో ఉంచిన యాపిల్ ల్యాప్‌టాప్, ఖరీదైన వాచీలు, 50 వేల నగదుతో పాటు ఇతర ఖరీదైన వస్తువులను తీసుకుని పారిపోయారు. మే 31న ఇంటి నుంచి దుర్వాసన రావడంతో చుట్టుపక్కల వారు పోలీసులకు ఫోన్ చేసి విషయం తెలియజేశారు. పోలీసులు ఇంటికి వెళ్లి చూడగా వృద్ధురాలు, కుమార్తె గొంతు నులిమి హత్య చేసినట్లు కనుగొన్నారు.
