తెలంగాణలో విద్యుత్ వినియోగదారులకు వేస్తున్న డెవలప్ మెంట్ చార్జీలు భారంతో చుక్కలు కనిపిస్తున్నాయి. దీనికి తోడు డిస్కంలు నష్టాల్లో ఉండటంతో చార్జీలు పెంచే యోచనలో యంత్రాంగం ఉంది. ఇప్పటికే డిస్కంలు ఏఆర్ఆర్లను రెగ్యులేటరీ కమిటీకి అందజేశాయి. వచ్చే బడ్జెట్ సమావేశాల్లో దీనిపై నిర్ణయం తీసుకోవాల్సి ఉంది. సామాన్య జనంపై వేల కొద్దీ భారం విధించడంతో వినియోగదారులు గగ్గోలు పెడుతున్నారు. తీవ్ర ఆందోళనకు గురవుతున్నారు. కొవిడ్కారణంగా ఉద్యోగాలు కోల్పోయి ఎంతో ఆర్థిక భారాన్ని ప్రజలు ఎదుర్కొన్నారు. ఇప్పుడిప్పుడే పరిస్థితి కొంత మెరుగవుతున్న క్రమంలో డెవలప్మెంట్ చార్జీల పేరిట భారీ మొత్తంలో వసూలు చేయడంతో వినియోగదారులకు ఇబ్బందిగా మారింది. గృహాల్లో విద్యుత్ ను వినియోగించే కెపాసిటీ ఆధారంగా డెవలప్మెంట్ చార్జీలు ఉంటాయి. కొత్తగా ఇండ్లు నిర్మించుకునే వారు సాధారణంగా అప్పటి అవసరాలకు తగినట్లుగా 1 కిలోవాట్కోసం మాత్రమే దరఖాస్తు చేసుకుంటారు. ఎందుకంటే నిర్మాణ సమయంలో వారు వినియోగించుకునే విద్యుత్తక్కువగా ఉంటుంది. 1 కిలోవాట్ అంటే 1000 వాట్లకు సరిపడ విద్యుత్ వినియోగించుకునేందుకు అవకాశం ఉంటుంది. ఆ పరిధిని మించితే మరో కిలోవాట్కు డెవలప్మెంట్ చార్జీలను అధికారులు విధిస్తారు. ఆ చార్జీల ద్వారా ట్రాన్స్ఫార్మర్లపై లోడ్ పడకుండా ఉండేందుకు ఖర్చు చేస్తారు. ఒక ఇంట్లో టీవీ, ఫ్యాన్, ఫ్రిడ్జి, మిక్సీలాంటి యంత్రాలను వినియోగించినా ఒక కిలోవాట్సామర్థ్యానికి మించి వినియోగించలేరు. అదే ఏసీ లాంటి భారీగా విద్యుత్ వినియోగించే యంత్రాలు ఎక్కువ లోడ్ను వినియోగించుకుంటాయి. కాబట్టి ట్రాన్స్ఫార్మర్లపై లోడ్ పెరిగిపోయి కరెంట్ సరఫరాకు తీవ్ర ఇబ్బందులు ఎదురయ్యే ప్రమాదముంటుంది. విద్యుత్ అధికారులు రెండు కేటగిరీల కింద విభజించి ఒక్కో కిలోవాట్కు ఒక్కో చార్జీ విధిస్తోంది. డొమెస్టిక్ వినియోగానికి ఒక రేటు ఉంటే కమర్షియల్ వాడకానికి మరో రేటును ఫిక్స్ చేసింది. డొమెస్టిక్ పరిధిలో ఒక కిలోవాట్ సామర్థ్యానికి ఫీజుగా రూ.1000గా నిర్ణయించారు. దీనికి అదనంగా జీఎస్టీ ఉంటుంది. అన్నీ కలిపి రూ.1400 ఖర్చవుతుంది. అదే కమర్షియల్ పరిధిలో అయితే రూ.2000 ఉంటుంది. దీనికి అదనంగా జీఎస్టీ ఉంటుంది. డొమెస్టిక్లో 2 కిలోవాట్లకు రూ. 2800 అయితే కమర్షియల్లో రూ.5000 ఖర్చవుతుంది. ఇలా వినియోగదారుల విద్యుత్ వాడకాన్ని బట్టి అధికారులు రేట్ ఫిక్స్ చేశారు. అయితే 20 కిలోవాట్ల సామర్థ్యాన్ని మించితే ట్రాన్స్ ఫార్మర్లపై లోడ్ పడకుండా ఉండేందుకు సొంతంగా ట్రాన్స్ఫార్మర్పెట్టుకోవాలని అధికారులు సూచిస్తున్నారు.
తెలంగాణలో భారీగా విద్యుత్ డెవలప్ మెంట్ ఛార్జీలు
February 15, 2022
0
Tags