జాబ్ నోటిఫికేషన్ల కోసం నిరుద్యోగులు, ప్రమోషన్ల కోసం ఉద్యోగులు ఏండ్ల తరబడి ఎదురు చూస్తుంటే వాళ్లను కాదని సర్వీసు నుంచి రిటైర్ అయినవాళ్లను తెలంగాణ రాష్ట్ర ప్రభుత్వం అందల మెక్కిస్తున్నది. తమకు అత్యంత సన్నిహితులైనవాళ్లను పెద్ద పెద్ద పోస్టులు ఇచ్చి కూర్చోబెడుతున్నది. రాష్ట్రం ఏర్పడినప్పటి నుంచి ఇదే తంతు నడుస్తున్నది. నిరుడు మర్రి చెన్నారెడ్డి హ్యూమన్ రిసోర్స్ డెవలప్మెంట్ సెంటర్ (ఎంసీహెచ్ఆర్డీ)లో ముగ్గురు రిటైర్డ్ ఆఫీసర్ల నియామకం జరిగినట్లు ఇటీవల ఆర్టీఐ ద్వారా వెల్లడైంది. వీరి వయసు 65ఏండ్లకుపైనే ఉంటుంది. టూరిజం డిపార్ట్మెంట్లోనూ ఇలాంటి వాళ్లు పది మంది ఉన్నట్లు తెలుస్తున్నది. ఈ రెండు డిపార్ట్ మెంట్లే కాకుండా అన్ని డిపార్ట్ మెంట్లలో కలిపి దాదాపు 3వేల మందికిపైగా రిటైర్డ్ ఎంప్లాయీస్ మళ్లీ కొలువులు చేస్తున్నట్లు సమాచారం. కొందరు అడ్వయిజర్లుగా, ఇంకొందరు కన్సలెంట్లుగా పనిచేస్తున్నారు. వీరికి ఒక్కొక్కరికి లక్ష రూపాయలకుపైనే జీతం వస్తున్నది. దానికి తోడు అన్నిరకాల సౌలతులు అందుతున్నాయి. ఫైనాన్స్ డిపార్ట్‌మెంట్‌కు అనుబంధంగా ఉన్న ఎంసీహెచ్‌ఆర్డీలో ప్రకాశ్రావు, గౌతమ్ పింగ్లే, అబ్బాస్ అలీ అనే ముగ్గురు రిటైర్డ్ ఆఫీసర్లు పనిచేస్తున్నట్లు ఇటీవల ఆర్టీఐ ద్వారా తేలింది. కాంగ్రెస్ లీడర్ బక్క జడ్సన్ ఈ సమాచారాన్ని సేకరించారు. ఈ ముగ్గురి వయసు 65 ఏండ్ల పైనే ఉంది. రూల్స్ ప్రకారం 65 ఏండ్లకు పైబడిన వ్యక్తులను డ్యూటీలోకి తీసుకోకూడదు. కానీ, రూల్స్‌కు వ్యతిరేకంగా నిరుడు ముగ్గురు రిటైర్డ్ ఆఫీసర్లను ఎంసీహెచ్ఆర్డీలోకి తీసుకున్నారు. వీరిలో ప్రకాశ్ రావుకు 70 ఏండ్లు అని, ఏపీకి చెందిన వ్యక్తి అని బక్క జడ్సన్ అన్నారు. ఒకే వ్యక్తిని డైరెక్టర్ (ఫెసిలిటీస్ ), జనరల్ మేనేజర్ ( ఫెసిలిటీస్ ) రెండు పోస్టుల్లో నియమించినట్లు, రూ. లక్ష జీతం ఇస్తున్నట్లు ఆర్టీఐలో ఎంసీహెచ్ ఆర్డీ వెల్లడించిందని ఆయన చెప్పారు. ఫైనాన్స్ డిపార్ట్‌మెంట్ కింద ఉన్న ఎంసీహెచ్ ఆర్డీలో నియామకాలపై మంత్రి హరీశ్‌కు లెటర్ రాసినా స్పందన లేదని, హైకోర్టులో పిల్ దాఖలు చేశానన్నారు. రాష్ట్ర ఆవిర్భావం నుంచి కొందరు రిటైర్డ్ అధికారుల సర్వీస్ ను ప్రభుత్వం పొడిగిస్తూ వస్తున్నది. 2014 లో రిటైర్ అయిన అధికారులు, ఉన్నతాధికారులు ఇప్పటికీ సర్వీసులో కొనసాగుతున్నారు. వీరికి జీతం, వెహికల్ , సిబ్బంది, ఇతర అలవెన్సులు కలిపి ఏటా కోట్ల రుపాయలు సర్కారు ఖర్చు చేస్తున్నది. రిటైర్డ్ ఐఏఎస్ లు, రిటైర్డ్ ఐపీఎస్ లను కన్సల్టెంట్లుగా , అడ్వయిజర్లుగా నియమించుకుంటున్నది. మాజీ సీఎస్ లు, మాజీ డీజీపీలు ప్రస్తుతం సర్కారులో కీలక పదవుల్లో ఉన్నారు. ఆర్ బీ , ఇరిగేషన్, విద్యుత్ లో ఈఎన్ సీ, సీఈ సర్వీస్ కంప్లీట్ అయినప్పటికీ కొందరికి సర్వీస్ ను ప్రభుత్వం పొడిగించింది. దాదాపు అన్ని శాఖలు, వాటి అనుబంధ విభాగాల్లో సుమారు 3 వేల మంది రిటైర్డ్ అధికారులు ఇంకా పనిచేస్తున్నట్లు కాంగ్రెస్ లీడర్ బక్క జడ్సన్ పేర్కొన్నారు. దీన్నే కోట్ చేస్తూ ఆయన హైకోర్టులో పిల్ వేశారు. ఒక్కో డిపార్ట్ మెంట్ లో అడ్వయిజర్లు, కన్సల్టెంట్లు కాకుండా సుమారు ఐదుగురు రిటైర్డ్ ఉద్యోగుల కొనసాగుతున్నారని తెలిపారు. వీళ్లందరినీ తొలగించి కింది స్థాయి ఉద్యోగులకు ప్రమోషన్లు ఇవ్వాలని, ఖాళీ పోస్టులకు జాబ్ నోటిఫికేషన్లు విడుదల చేయాలని డిమాండ్ చేశారు. రిటైర్ అయినవాళ్లను కొనసాగిస్తుండటంతో మరో వైపు కింది స్థాయి అధికారులు ఏండ్ల తరబడి ప్రమోషన్లు లేక అదే హోదాలో రిటైర్ అవుతున్నారు.
