ఒకప్పటి స్టార్ హీరోయిన్ సులోచన లాట్కర్ ఆదివారం రాత్రి కన్నుమూశారు. గత కొన్నాళ్లుగా తీవ్ర అనారోగ్య సమస్యలతో బాధపడుతున్న ఆమె ముంబై వద్ద ఉన్న దాదర్ లో సుశ్రూష ఆసుపత్రిలో చికిత్స తీసుకుంటూ 94 ఏళ్ళ వయసులో మరణించారు. స్వతంత్రం ముందు కర్ణాటకలో పుట్టిన సులోచన ముంబైకి వెళ్లి సినీ పరిశ్రమలో 1940 లో హీరోయిన్ గా ఎంట్రీ ఇచ్చింది. కెరీర్ ఆరంభంలో హిందీ, మరాఠి సినిమాల్లో హీరోయిన్ గా నటించి మెప్పించింది. అనంతరం క్యారెక్టర్ ఆర్టిస్టుగా కూడా బాలీవుడ్ లో చాలా సినిమాలు చేసింది. ఎక్కువగా అమ్మ పాత్రల్లో కనిపించి బాలీవుడ్ అమ్మగా పేరు సంపాదించింది. 1980ల కాలంలో దాదాపు స్టార్ హీరోలు, హీరోయిన్స్ అందరికి అమ్మలా నటించింది సులోచన. దాదాపు 60 ఏళ్ళ లాంగ్ కెరీర్ లో 250కు పైగా హిందీ, మరాఠి సినిమాల్లో నటించింది. చివరిసారిగా ఆమె 2007లో ఓ హిందీ సినిమాలో నటించింది. అప్పట్నుంచి ఆమె సినిమాలకు దూరంగానే ఉంటున్నారు. 1999లో కేంద్ర ప్రభుత్వం నుంచి పద్మశ్రీ అవార్డు అందుకున్నారు సులోచన లాట్కర్. 2009లో మహారాష్ట్ర ప్రభుత్వం నుంచి మహారాష్ట్ర భూషణ్ అవార్డు అందుకున్నారు. సులోచన లాట్కర్ మరణంతో బాలీవుడ్ లో తీవ్ర విషాదం నెలకొంది. పలువురు బాలీవుడ్ సినీ ప్రముఖులు ఆమెకు నివాళులు అర్పిస్తున్నారు.
