తమిళనాడులో చెన్నై పోలీసులు పురాతన శివలింగం లోహ విగ్రహాన్ని అమ్మడానికి ప్రయత్నిస్తున్న వ్యక్తులను పట్టుకున్నారు. దీనివిలువ రూ.25 కోట్లు వుంటుంది. పురాతన కాలం నాటి గ్రీన్‌స్టోన్ శివలింగం లోహ విగ్రహం విక్రయానికి సంబంధించిన సమాచారం మేరకు ఐడల్ వింగ్ సీఐడీ డీజీపీ డాక్టర్ జయంత్ మురళి, సీఐ తన బృందాన్ని రహస్యంగా ఆపరేషన్ చేయాలని ఆదేశించారు. చెన్నై సమీపంలోని పూనమల్లెలో విగ్రహం అమ్మకందారులను సంప్రదించారు, విగ్రహానికి రూ. 25 కోట్ల ధరను చెల్లించడానికి అంగీకరించారు. అమ్మకందారులు తమ రహస్య గదిలో నుండి విగ్రహాన్ని బయటకు తీయడంతో, పోలీసులు ఇద్దరు నిందితులను పట్టుకుని విగ్రహాన్ని భద్రపరిచారు. ఇది లోహ నాగాభరణంతో కూడిన ఏక ముఖ లింగం. నాగాభరణం దిగువన, ఇది డమరు, శూలం, పాము లను కలిగి ఉంటుంది. పాము వెనుక భాగంలో గరుత్మంతుడు వున్నాడు. నిపుణుల అభిప్రాయం ప్రకారం, ఈ విగ్రహం 500 సంవత్సరాలకు పైగా పురాతనమైనది మరియు బహుశా నేపాల్‌కు చెందినది కావచ్చు. విగ్రహం ఎక్కడినుంచి తెచ్చారనే దానిపై విచారణ జరుపుతున్నారు. మిగిలిన ఇద్దరు నిందితులను పట్టుకుంటే మరిన్ని వివరాలు తెలుస్తాయని పోలీసులు తెలిపారు.
