గేమింగ్ ప్రియులకు పబ్‌జీ అంటే ఎంత పిచ్చో ప్రత్యేకంగా చెప్పక్కర్లేదు. అప్పట్లో మొబైల్స్‌కు అతుక్కుపోయి మరీ ఈ గేమ్‌ను ఆడేవారు. కానీ భద్రత కారణాల రీత్యా పబ్‌జీని కేంద్రం ప్రభుత్వం నిషేధించింది. దీంతో పబ్‌జీ ఇండియా వర్షన్‌ను బ్యాటిల్ గ్రౌండ్ మొబైల్స్ ఇండియా పేరుతో తీసుకొస్తామని ప్రకటించింది. అన్ని అడ్డంకులను దాటుకుని జూలై 2న ఈ గేమ్ విడుదలైంది. అయితే ఈ గేమ్ లాంఛ్ అయిన వెంటనే విపరీతమైన క్రేజ్ తెచ్చుకుంది. ప్లే స్టోర్‌లో ఈ యాప్ దూసుకెళ్తోంది. ప్లే స్టోర్‌లో ఈ వారం ఫ్రీ గేమ్స్‌లో టాప్‌లో నిలిచింది. కేవలం పదిరోజుల్లోనే ప్లే స్టోర్ నుంచి ఈ గేమ్‌ను 3.4కోట్ల మంది డౌన్‌లోడ్ చేసుకున్నారు. ఈ గేమ్‌కు 1.6 కోట్ల మంది డైలీ యాక్టివ్ వినియోగదారులు ఉన్నారని క్రాప్టన్ సంస్థ తెలిపింది. ఈ బ్యాటిల్ గ్రౌండ్ గేమ్‌కు వస్తున్న ఆదరణ పట్ల ఆ ఆ సంస్థ ఇండియా డివిజన్ హెడ్ వూ యెల్ ధన్యవాదాలు తెలిపారు. ఈ గేమ్ మరింత దూసుకెళ్తుందని అంచనా వేస్తున్నామన్నారు. భవిష్యత్తులో మరింత వినోదభరిత కంటెంట్‌ను గేమ్‌లో జత చేస్తామని చెప్పారు. ప్రస్తుతానికి ఈ బాటిల్‌ గ్రౌండ్ మొబైల్స్ ఇండియా గేమ్ ఆండ్రాయిడ్ యూజర్ల కోసం మాత్రమే విడుదలైంది. ఐవోఎస్ వర్షన్ ఇంకా రెడీ కాలేదు. యూట్యూబ్‌లో జూలై 8న నిర్వహించిన గేమ్ లాంచ్ పార్టీ, టోర్నమెంట్‌ను 50 లక్షల మంది చూశారని క్రాప్టన్ సంస్థ ప్రకటించింది.
